Sco il president da la conferenza, Sigi Asprion, ha declerà a la seduta dal parlament regiunal, duess la destinaziun turistica restar en sia furma existenta, però cun singuls midaments. Uschia vuless ins transmidar l’organisaziun en ina societad d’aczias. Singulas lezias vegnian surdadas extern.
Adattaziuns vegni tenor Asprion er a dar tar il budget da l’organisaziun. Actualmain ha la destinaziun Engiadina San Murezzan a disposiziun bun 15 milliuns francs l’onn. A partir dals 19 d’october 2015 ha la populaziun durant in mais la pussaivladad da pigliar posiziun en chaussa e da proponer adattaziuns e correcturas.
Las singulas vischnancas decidan entaifer ils emprims trais mais dal 2016 davart las novas structuras da la destinaziun turistica.
Preventivs per il 2016
Durant la sesida dal cussegl regiunal d’Engiadin’Ota ha il parlament approvà plirs budgets per il 2016. Tranter auter quel da l’ospital regiunal a Samedan ch' è sin buna via da purtar finanzialmain sasez a partir dal 2018.