Dapi l'onn 2018 sto tgi che vul daventar burgais svizzer far in examen da lingua. Enfin il november 2021 eri mo pussaivel da far il test per tudestg, talian u franzos. Dapi lura pon persunas interessadas far il test era per rumantsch, duas giadas l'onn a Cuira.
L'emprim ed enfin oz unic ch'ha fatg quai il mars 2022 è Marco Monteiro da Sent, oriund dal Portugal. El vul daventar burgais svizzer e dovra perquai il diplom da lingua per pudair cumenzar cun la procedura da natiralisaziun.
Il rumantsch è mia lingua dal mintgadi, a chasa e tar la lavur, perquai vulev jau far il test per rumantsch.
L'examen sa cumpona d'in test a bucca ed in test en scrit. Cun il diplom en giaglioffa po el far ils proxims pass en direcziun pass svizzer.
Il svilup da l'examen
Responsabel per l'examen da lingua è il biro «fide», il program dal Secretariat statal da migraziun per la promoziun da l'integraziun linguistica. Ensemen cun l'uffizi da migraziun dal Grischun e la Lia Rumantscha ha il «fide» sviluppà l'examen da rumantsch.
L'examen sa basa sin la vita dal mintgadi. I va per encleger e per esser bun da s'exprimer.
L'examen sa basa sin ils medems criteris sco ils examens da las autras linguas, l'uschenumnà rom da referenza europeic per linguas. Quai è in livel standardisà cun differents stgalims.
Grazia a quels criteris standardisads pudain nus valitar las cumpetenzas linguisticas d'ina persuna era per rumantsch.
Il test da lingua dovra dapi l'onn 2018 mintga persuna che vul daventar burgais svizzer, ma era tgi che dumonda ina lubientscha da dimora u da lavur.