Suenter discussiuns animadas e suenter avair refusà da spustar la tractanda sin pli tard – ha la radunanza communala da Samedan ditg cun 168 cunter 105 vuschs Gea a la realisaziun da la nova ovra solara.
Ovra producescha 37 uras gigawatt electricitad
Il project previs ha ina dimensiun da 40 hectaras e duai producir en in onn 150% da l'energia che l’entira vischnanca da Samedan dovra. Cun plaina capacitad saja quai energia per passa 12'000 chasadas. 50% da l’energia possia vegnir producida durant ils mais d’enviern, uschia Martin Merz, il president dal cussegl d’administraziun da la firma Energia solara engiadinaisa. Il lieu sper la plazza aviatica saja tenor el ideal, perquai ch’ins possia colliar differentas infrastructuras existentas.
Suenter il Gea dals Samedrins e da las Samedrinas ha la Energia solara engiadinaisa da tractar cun ils 11 possessurs da terren. En in proxim pass vai quest atun 2023 per inoltrar la dumonda da construcziun tar il chantun. Senza recurs dad instanzas ed organisanziuns è l’emprima etappa da las lavurs prevesida la primavaira dal 2024.
Quint annual allegraivel
Ultra da quai ha la radunanza communala da Samedan approvà il rendaquint 2022. Quel serra cun in gudogn da 3,89 milliuns francs. Ditg Gea han ils Samedrins er ad in credit da 200'000 francs per realisar la centrala d'energia Promulins en la scola industriala, ed al nov contract cun la destinaziun turistica Engiadina Turissem.
