Ils bajetgs da l'Alp Sprella en la Val Müstair na pon betg vegnir transfurmads en il proxim temp en ina chamona dal Club alpin svizzer.
Las organisaziuns per l'ambient WWF Grischun e la Pro natura Grischun han decis da trair vinavant lur recurs davant il Tribunal federal. Il cumenzament da november ha la dretgira administrativa dal chantun Grischun renvià il recurs, che las organisaziuns avevan fatg la stad 2021, en tut ils puncts.
Las organisaziuns d'ambient han tema che la Val Mora, che saja ina da la paucas regiuns selvadias dal territori alpin, vegniss strapatschada tras turists e turistas da la nova chamona, scrivan ellas en ina communicaziun. Quai pudess tranter auter chaschunar problems per bleras spezias periclitadas sco il tschess barbet e l'evla da la pizza.
Cun quest recurs duai la secziun dal Club alpin svizzer da l'Engiadina Bassa e Val Müstair ussa spetgar cun la cuntinuaziun planisaziun dal project. Els fetschian quint cun investiziuns da 2,5 milliuns francs.
Sco la vischnanca Val Müstair ha communitgà il november saja il project vegnì surlavurà pliras giadas, uschia ch'el sa cumportia bain cun las finamiras communablas da la vischnanca Val Müstair e da la Biosfera Val Müstair.
Or da l'archiv
