Siglir tar il cuntegn

Header

video
Il Maraton da skis engiadinais è stritgà per la segunda giada
Or da Telesguard dals 06.01.2021.
laschar ir. Durada: 3 minutas 6 Secundas.
cuntegn

Decisiun è crudada Nagin Maraton da skis engiadinais dal 2021

Las circumstanzas pervia dal coronavirus sforzan ils organisaturs da la pli gronda cursa da passlung da la Svizra d’annullar la 53avla ediziun dal Maraton da skis engiadinais. Sper il maraton dals 14 da mars èn er annulladas las singulas cursas da l’emna avant. Vul dir la cursa da dunnas sco er la cursa ed il sprint da notg. Tenor Menduri Kasper, il CEO dal Maraton da skis engiadinais, hajan ins vis che la situaziun actuala n'è anc betg propi meglierada ed er en vista pli lunga saja la situaziun plitost sombra. Auter che la sditga per l’ediziun dal 2020 ans saja quest onn però stà preparà per ina tala decisiun.

Per l’ediziun dal 2020 essan nus vegnids surprais da stuair annullar il maraton. Quest onn han ins adina gì ina tala situaziun en il chau.
Autur: Menduri Kasper CEO maraton da skis engiadinais

Elavurà quatter scenaris

Gia d’atun ha il comité d’organisaziun elavurà differentas alternativas per la cursa principala dal maraton da skis. Sper ina cursa cun adattaziuns tar la partenza ed en l’arrivada, fiss er stada prevesida ina cursa sur plirs dis. Premissa èn però stadas tar tut las variantas che almain 800 persunas avessan pudì esser a la partenza. Tenor Menduri Kasper è numnadamain l’atmosfera quai che fa ora il maraton da ski engiadinais. Perquai hajan ins lura er mess ad acta quellas pussibilitads.

Cursa da profis

Sco unica varianta pussaivla vegn uss anc discutada ina cursa da profis. Sch’i dat ina tala cursa è actualmain en elavuraziun e vegn decis tenor Kasper fin la fin da schaner.

Maraton da skis engiadinais individual

Betg sco alternativa per il maraton mabain sco nova spierta datti quest onn in maraton da skis engiadinais individual. Numnadamain vegn installada tranter ils 5 ed ils 14 da mars ina mesiraziun sin il traject tranter Malögia e S-chanf. Tgi che vul po s'annunziar per quest eveniment ed absolver durant quels dis ses maraton da skis persunal.

RTR actualitad 17:00

Artitgels legids il pli savens