Enfin ils 31 da zercladur han commembers d’uffizis politics a Schlarigna gì la pussaivladad d’inoltrar lur demissiun per la fin dal 2025. Betg pli en cursa va Christian Brantschen sco president communal.
Il politicher da 70 onns è stà duas giadas al timun da la vischnanca da Schlarigna. L’emprima giada durant 12 onns (1995 – 2006) e dal 2013 aveva el gudagnà il cumbat electoral tranter trais candidats per il presidi. Cun sia demissiun per la fin da l’onn va uschia a fin in’era da 24 onns al timun da la vischnanca da Schlarigna.
Christian Brantschen è er engaschà sur ils cunfins da Schlarigna, numnadamain en differents uffizis. Uschia è el per exempel president da la fundaziun purtadra da l'ospital regiunal a Samedan. Quel ospital è actualmain a la tschertga d'ina soluziun per sias sfidas finanzialas. Er en connex cun la plazza aviatica era Brantschen dumandà, numnadamain en sia funcziun sco president da la conferenza da la plazza aviatica.
Gronda roschada en la suprastanza
In grond midament vegni er a dar tar il gremi da la suprastanza. Sco la vischnanca da Schlarigna communitgescha, han inoltrà ulteriurs trais commembers lur demissiun, la quarta persuna ha da bandunar la suprastanza causa limitaziun dal temp d’uffizi.
- Seraina Poltera (limitaziun dal temp d'uffizi)
- Andrea Fanconi
- Fadri Denoth
- Brigitte Büeler
Be duas da set persunas restan damai en suprastanza communala per ina proxima legislatura – numnadamain Monica Günthard e Lino Andreazzi.
Il motiv dad Andrea Fanconi da bandunar la suprastanza è quel ch'el vul daventar president communal. Fanconi è il manader da l’uffizi da scussiun e falliment da la regiun Malögia e restass cun quella candidatura anc en la suprastanza communala da Schlarigna.
Novitads, eveniments ed istorgias localas. Tut tge che curra e passa en l'Engiadina chattais vus qua.
Il termin per inoltrar ina candidatura per ils differents sezs vacants è il prim da settember 2025. L'emprim scrutini è ils 4 da november, in eventual segund è ils 15 da december.
Or da l'archiv