Il prim da favrer aveva Tina Boetsch cumenzà ses uffizi sco CEO da la destinaziun turistica d'Engiadin'Ota. Uss banduna ella dentant l’interpraisa sin agen giavisch. Il motiv sajan differentas ideas ed opiniuns davart la collavuraziun tranter la dunna da 45 onns e l’organisaziun turistica.
Nus avain gì differentas aspectativas davart tematicas, las rollas e las responsabladads en il team. Uschia n’era betg avant maun ina basa per lavurar ch’è necessaria per sviluppar vinavant l’interpraisa.
Suenter otg mais a la testa da l'organisaziun haja ella pia decis per il bain da la chaussa e tratg in stritg. Tuttina saja ella cuntenta d'avair lavurà ensemen cun il team vid la nova posiziun strategica da l’interpresa. Il midament da persunal na pericliteschia betg il process instradà areguard la nova strategia da la destinaziun fin il 2023.
Sco Kurt Bobst, il president dal cussegl administrativ ha ditg ad RTR saja er stada ina raschun ch’i na saja betg grategià da furmar in team en la direcziun cun finamiras cuminaivlas. La direcziun operativa vegnia entant manada sco gia avant che Tina Boetsch aveva cumenzà, da Marijana Jakic, Jan Steiner e Thomas Rechberger. Il sez da CEO na vegnia fin tar la proxima radunanza generala, la primavaira da l’onn che vegn betg occupà, uschè Kurt Bobst.
Il proxim temp ans focussain sin ils projects instradads, furmain las structuras internas necessarias e decidain alura co vinavant.
