La Conferenza da presidents da la Regiun Malögia ha decis en sia sesida da surdar la lezia ad ina gruppa da 5 persunas. A quella fan part:
- Andrea Gilli – Zuoz
- Christian Brantschen – Schlarigna
- Christian Jott Jenny – San Murezzan
- Christian Meuli – Segl
- Daniel Bosshard – Silvaplauna
Ils presidents communals da las vischnancas da Zuoz e Schlarigna avevan preschentà a la Conferenza a San Murezzan duas variantas pussaivlas per ina reorganisaziun da la destinaziun. In varianta prevesess la structura organisatorica che las gruppaziuns da purtaders da prestaziun (Leistungsträger) tegnessan 60% da las aczias, las vischnancas 40%. Ultra da quai duess tenor proposta dals dus presidents ina sort lavuratori extern, in uschenumnà «Think Tank», cussegliar e dar inputs d’ordaifer a l’organisaziun.
Metter tut sin il chau ?
La nova structura da la destinaziun turistica pudess er pretender adattaziuns dals statuts actuals e tut tenor er midaments a reguard las cunvegnas da prestaziun cun las vischnancas.
I fa prescha
Fin a la radunanza generala da l'organisaziun turistica Engiadina San Murezzan da questa primavaira, duai esser definì il nov cussegl administrativ. En in proxim pass duai il nov gremi prender en maun ensemen cun las vischnancas la tscherna d’in nov CEO.
RTR actualitad 12:00