Malgrà la trid’aura èn vegnids radund 80 persunas al di da cuntrada, organisada da la Biosfera Val Müstair ensemen cun la Pro Natura, ils chatschaders ed ils pestgaders.
En pitschnas gruppas ha la populaziun tgirà plirs biotops sensibels, sco per exempel ils mirs sitgs per il luschard verd ch'è fitg rar en Grischun u costas per il egliet da grippa, in spler ch'è era en privel da svanir.
Cun ils pestgaders a dretga e sanestra dal Rom
Cun in satg en maun, cun guants e stivals chaminan ils pestgaders a dretga e sanestra dal Rom, tschertgond il material. Bunamain ina remortga d'in auto plain vegn ensemen. Tenor il guardiapestga Nicola Gaudenz è quest di da cuntrada impurtant da duas sorts, dad ina vart ins diminuescha il plastic ed auters materials en l’aua e da l’autra vart ins sensibilisescha la populaziun da tgirar la natira.
Il 2015 aveva ina malaura gì grevas consequenzas per ils peschs en il Rom, ma ussa è puspè sa meglierada la situaziun, uschia il guardiapestga da l’Engiadina Bassa e Val Müstair. Ils peschs chattian oz ina buna qualitad da viver ed er in ideal spazi per sa reproducir.
Sper ils pestgader ed ulteriurs amis da la natira en viadi a rumir la natira sin costas, tagliar bostgaglia, allontanar saivs, deliberar mirs setgs e bler auter pli. Radund 80 persunas èn suandadas il clom da la Biosfera Val Müstair ensemen cun las societads da pestga e chatscha, cun la vischnanca e la Pro Natira Val Müstair.
