Cun il chavazzin «fabulus» vul la nova organisaziun colliar las trais muntognas ed en il medem mument posiziunar ellas sco singulas muntognas. Tuttas trais han numnadamain insatge fabulus, sco il president dal cussegl administrativ Franco Tramér declera.
La diavola da la Diavolezza stat per la vista diabolica, ma era per ina figura passiunada, chauda e fraida en il medem mument e bella sco il fieu en la naiv. Il corv dal Corvatsch duai simbolisar l'aria fina sin sur 3000 meters sur mar. Il lai alv da la Lagalb duai star per in lieu natural, mistic ed aventurus sco aua e glatsch.
Plans per l'enviern
Era sch'i ha midà pauc sin l'emprima vista, l'emprim di da la stagiun d'enviern datti plans che duain vegnir realisads anc quest enviern. Tranter auter duai dar in tarpet magic dal parcadi e da la staziun Diavolezza si tar la staziun da val. Per la Lagalb duai dar bigliets per singulas descensiuns. E tranter la Diavolezza e la Lagalb duai la colliaziun vegnir megliurada.
Cumenzà la stagiun ha la Diavolezza cun in grond apero ils 21 d'october. Enfin ils 24 da november pon ins ussa ir cun ils skis, lura vegn la pendiculara serrada per la revisiun enfin ils 23 da december. Ils 25 da november avra lura per la paja il Corvatsch sias portas.
RR actualitad 08:00