Siglir tar il cuntegn

Header

Video
S-chanf: renfatschas envers selvicultur da la vischnanca
Or da Telesguard dals 14.10.2019.
laschar ir
cuntegn

Dispensa selvicultur S-chanf Affars illegals e reproschas - anteriurs collavuraturs raquintan

Suenter ch'il president communal da S-chanf aveva infurmà l'emna passada la radunanza communala ch'il selvicultur saja vegnì dispensà, mussa il cas adina pli grondas dimensiuns. Tschintg anteriurs collavuraturs da la vischnanca da S-chanf discurran tranter auter d'affars illegals da laina sur cunfin. Ils anteriurs collavuraturs han vulì restar anonims.

Reproschas envers anteriur patrun

Sco ils anteriurs collavuraturs han ditg envers RTR duai in grond dumber da laina preziusa esser vegnida vendida illegalmain sur cunfin. Il transport da quella laina saja adina vegnì cumbinà cun autra laina per arder. Vul dir, cumbinà cun laina da main buna qualitad.

Plinavant dian ils anteriurs emploiads ch'els hajan mess en dumonda quels affars. Els sajan dentant vegnids confruntads cun reproschas diras da lur patrun.

Ozendi numnan ins quai ch’el ha fatg cun nus mobing.
Anteriur collavuratur

Affars cun laina da glina

D'affars dubius rapportan ils anteriurs collavuraturs cun ils quals RTR ha gì contact er en connex cun la laina da glina, l’uschenumnada marca «Mondholz». Sin tge moda e maniera ch'il selvicultur haja dentant fatg ils affars cun questa laina, n’han els betg savì dir.

Reacziun en scrit da la vischnanca – nagina dal selvicultur inculpà

Il selvicultur dispensà n'è betg stà cuntanschibel. Il president communal da S-chanf ha en sia posiziun a scrit confermà la dispensa immediata dal selvicultur ed infurmà ch'ins haja instradà in'examinaziun administrativa entras ina firma spezialisada. Quella prenda cunzunt sut la marella las fatschentas dals onns 2015 e 2016. Duri Campell ch'è stà president communal da S-chanf dal 2010 enfin il 2016 n'ha betg vulì prender posiziun.

La Polizia chantunala è actualmain vid inquisiziuns en chaussa. I vala la presumziun d’innocenza.

RR novitads 17:00