A Scuol datti ina dispita pervia da l'access a S-charl durant l'enviern. La vischnanca ha decidì da laschar averta la via uschè ditg ch'i n'ha betg naiv. Cura che la naiv arriva, vegn la via serrada per il rest da l'enviern. Perquai ha ussa decidì il bain da chavals San Jon da betg pli offrir ils viadis cun charrotscha fin a S-charl sco enfin ussa. Quai pervia che quels viadis funcziunian be sche la via è serrada per ils autos, ha ditg Men Juon, il manader da San Jon.
Consequenzas per l'hotel Mayor a S-charl
Quai ha consequenzas per l'hotel Mayor a S-charl. Quel è dependent dals giasts che arrivan en charrotscha durant il temp cura che la via è serrada per ils autos. Il hotel Mayor vegn uschia a perder giasts. L'hotelier Dominique Mayor ha discurrì dad enfin 800 pernottaziuns durant la stagiun d'enviern.
Nagins privilegis
La vischnanca percunter argumentescha ch'ins na possia betg simplamain serrar ina via publica senza basegn. Ins na possia betg privilegiar insatgi - en quest cas quels che porschian viadis en charrotscha, ha ditg il president communal da Scuol, Christian Fanzun. La via saja averta per tuts - era per las charrotschas.
