Il burgais da Samedan ha lavurà 37 onns en l'archiv da redacziun da la NZZ. Dal 1956 enfin il 1993 – a partir dal 1969 sco directur. El è era stà ami e promotur da l'Archiv culturel Engiadin'Ota, sco era autur da numerusas publicaziuns e contribuziuns davart l'emigraziun grischuna. Sia publicaziun la pli enconuschenta è il cudesch «Fast ein Volk von Zuckerbäckern?» (1985).
Fascinaziun per la genealogia già d'uffant
Gia d'uffant saja Kaiser sa mess a la tschertga da ses antenats. Sur decennis haja el retschertgà tut ils roms da ses arber genealogic. Ils discurs cun sia famiglia hajan adina dà buns impuls per tschertgar vinavant. Savens hajan ins discurrì dals parents che vivevan en l'exteriur. Gia sco scolar primar haja el scrit ils nums e las datas dal santeri a Samedan en in cudeschet. Il 1944, suenter sia confirmaziun, haja la lavur cun la genealoga Betti Steiger-Tippi lura dà ad el l'impuls da cumenzar cun la tschertga da ses perdavants en ils cudeschs da baselgia da la vischnanca.
Dolf Kaiser ha fatg la matura a Zuoz e frequentà a partir dal 1948 la scola d'art e la scola da commerzi a Turitg. Dal 1950 enfin il 1955 è el stà emploià en ina firma da decoraziun interna a Turitg.