Ch’i saja in sentiment fitg spezial uschè curt avant dad ir en pensiun, quai di Domenic Camastral da Puntraschigna. El ha instruì ina vita entira e guarda uss enavant sin l’ultima emna da scola da sia vita.
Spezial ultim onn da scola
L’ultim onn da scola avant sia pensiun saja stà fitg spezial. Per ina ha Domenic Camastral stuì organisar sia surdada avant la pensiun e per l’autra ha il magister e manader da scola stuì sa disar vid ina nova maniera d’instruir. Er el ha numnadamain instruì durant il lockdown davent da chasa. Tenor Domenic Camastral hai dà durant quel temp diversas pendenzas ch'han anc da vegnir elavuradas.
Finalmain ir trais emnas a chatscha
Suenter che quellas èn elavuradas e Domenic Camastral è lura propi in um pensiunà, sa legra el il pli fitg da pudair ir finalmain tut las trais emnas a chatscha – senza stuair esser cuntanschibel via telefonin.