Onur per ils pumpiers da la Val Müstair: la champiunessa olimpica Dominique Gisin è sa declerada pronta dad esser la madritscha dal nov autocisterna. Gisin è aposta viagiada en Val Müstair per festagiar il padrinadi sonda ils 9 da schaner.
Quai saja ina lezia speciala che fetschia grond plaschair ad ella, ha ditg Gisin a Radiotelevisiun Svizra Rumantscha. Dominique Gisin che è creschida si a Silvaplauna ha ina relaziun speciala cun la Val Müstair.
Sco giuvna saja ella stada en blers camps da trenament a Müstair per ir cun skis sin il glatscher dal Stelvio ha ditg Gisin.
Ella na possia betg acceptar tut las dumondas che arrivian tar ella, ma questa dumonda da la Val Müstair saja stada uschè simpatica e speciala ch'ella n'haja betg pudì dir na. Ussa saja ella fitg cuntenta dad esser per l'emprima giada en sia vita madritscha d'in auto da pumpiers ha ditg Dominique Gisin. Ella ha lura era gist fatg in gir en il nov auto da pumpiers.
