La vischnanca da Prutz en il Tirol dal Nord sa chatta sin 870 meters sur la mar. La fin d'avrigl ha ina front fraida chaschunà in donn immens tar las apricosas. Tut las fadias per impedir il donn na han gidà nagut.
La consequenza è in donn total per ils purs d’apricosas en il Tirol dal Nord. In zic pli pitschen è il donn per ils purs d’apricosas en il Tirol dal Sid. Qua fan ins quint cun ina sperdita da radund 80% da la racolta. Quai ha confermà Josef Wielander envers RTR. El è directur da l’organisaziun da producents da puma e da fritga dal Vnuost.
12’000 plantas senz’in fritg
L’affar da Gerhard Maass è dependent da las apricosas. Senza quellas na èsi betg pussaivel da far confitura e vinars. Sur tut la plantascha na crescha nagin fritg.
Donn da 300’000 euros
Il donn è grond. Na be ils purs dal Tirol dal Nord, era in autras regiuns datti fitg grondas perditas. Per fortuna na sun las apricosas betg l’unica entrada per il pur Gerhard Maass. El è anc destillatur per tut la regiun, uschia che quella entrada è garantida.
RR actualitad saira