Tenor il president communal da Segl, Christian Meuli vegn Segl cun gronda probabilitad a votar in'ulteriura giada l'avust. Per Segl munta il na da Puntraschigna ch'els ston pajar radund 40'000 francs dapli vi dals custs da planisaziun totals da 2.3 milliuns francs.
Era San Murezzan vegn a tractar il project in'ulteriura giada en il cussegl communal. Quest avess la cumpetenza da decider davart l'import supplementar da radund 300'000 francs. Tenor Christian Meuli vegnan els dentant era a laschar votar la populaziun in’ulteriura giada. Quai probabel il settember.
Planisar vinavant per 72 letgs da tgira
Era senza Puntraschigna planiseschan Segl, Silvaplauna e San Murezzan vinavant ina chasa da tgira cun 72 letgs. Uschè Christian Meuli.
Ensemen cun ina planisaziun a Promulins per ulteriurs 72 letgs vegn ins sin 144 letgs che fan da basegn per l'Engiadin'Ota.
RR Actualitad 12:00