Suenter ina pausa musicala da tschintg onns preschenta il cumponist, chantadur e musicist Curdin Nicolay duas novas singles. Er sch’ils davos onns èn musicalmain stads pli quiets, ha la vita da l'Engiadinais midà ferm ed è vegnida pli intensiva. Numnadamain è el daventà bab da dus figls.
Jau na stoss betg viver da la musica. Perquai n’hai jau er betg squitsch da producir nova musica.
Chanzuns pli persunalas
Las chanzuns da Curdin Nicolay sa basan sin experientschas ed istorgias da sia vita da mintgadi. Quai è er il cas tar sias duas novas chanzuns «Lai da Staz» e «Kino». Quellas ha el cumponì bel ed aposta per il giubileum da 20 onns Kino Openair dal Parc Naziunal. El raquinta d’ina amur passada. «Lai da Staz» è in’istorgia, nua ch’el raquinta dal mintgadi cun ses dus figls. Pli persunal e pli avert – quai saja il svilup da sias chanzuns, di Nicolay. Entant ch’el haja pli baud zuppentà intginas chaussas, chantia el oz pli persunal e pli avert.