A partir dal proxim onn da scola datti midaments en l’Institut Otalpin a Ftan, schebain mo modests per cumenzar. Oz ha gì lieu la preschentaziun dal nov acziunari principal – la Dulwich College International.
La lingua rumantscha resta
Tenor las infurmaziuns dal vicepresident da la scola internaziunala Christian Grütler prevesan ins da mantegnair la purschida actuala areguard la lingua rumantscha. Tenor la cunvegna da prestaziun cun il chantun vul ins inoltrar puspè era la maturitad bilingua rumantscha sut la circumstanza ch'i dettia avunda scolaras e scolars che vulan absolver quella.
Il sport resta
La purschida dal sport d’elita prevesan ins da mantegnair. Tenor Christian Gürtler duessan però tut las scolars e scolaras a l'Institut Otalpin profitar pli fitg da la purschida, perquai vegn quella purschida promovida spezialmain en avegnir.
La scola secundara – chaussa da las vischnancas
In grond midament datti. Per il vicepresident da la Dulwich College International era la purschida da la scola secundara a Ftan ina directa concurrenza cun las scolas communalas. Els prevesan perquai da stritgar quella e sa concentrar sin lur fermezzas, numnadamain il gimnasi ed il «IB-Diplom», quest diplom vegn reconuschì da las universitads impurtantas sin l’entir mund.
Serrar, avrir, restructurar
L’Institut Otalpin a Ftan ha gì dis turbulents. La novitad ch'il gimnasi da l'Engiadina Bassa sto serrar è sa derasada sco in fieu en il Grischun. In sguard enavos.
