La spierta «La Maisa Plus» datti dapi la stad 2019 a Puntraschigna. Quella aveva la vischnanca instradà sin atgna iniziativa e cumplettescha la tgira da scolaras e scolars er durant il temp da vacanzas. Il dumber da las annunzias creschia successivamain, uschia Doris Schär da l’administraziun communala da Puntraschigna.
Engraziaivels per la tgira professiunala durant la stad sajan surtut ils geniturs che lavuran en branschas turisticas. La tgira valess er durant las fins d’emna, dentant na saja la dumonda per il mument betg avant maun.
Auta occupaziun durant ils lavurdis
Il pli grond interess datti per la tgira dals uffants sper las lecziuns da scola. Uschia frequentian actualmain 28 uffants «La Maisa» a Puntraschigna. Mintgamai da glindesdi fin venderdi vegnan las scolaras ed ils scolars tgirads dad ina surveglianza professiunala ordaifer las uras d’instrucziun. Actualmain lavuran quatter persunas en in pensum parzial per las duas purschidas «La Maisa» e «La Maisa Plus». Quellas cumpiglian in gentar communabel en in hotel a Puntraschigna e suenter trategniment, tgira e sustegn per ils uffants tar lur lezias.
Ord motivs organisatorics vegnia uss mess tuttas duas purschidas sut in tetg. Ch’ins lavuria dentant gia uss fitg bain ensemen, suttastritga Doris Schär.
