Il cussegl cumön ha discutà durant passa duas uras davart la formulaziun per quella missiva. La proposta che la suprastanza aveva fatg al parlament, d’integrar en la constituziun la lezia, n’ha betg plaschì ni als burgais ni als represchentants da la Glista Libra.
Suenter ina discussiun animada s’han els finalmain decis per la proposta da la PLD. Quella pretenda ch’il circul possia instradar emprims pass per examinar ina fusiun in val, dentant betg sco lezia fixa en la constituziun.
Trais dumondas
Sper questa dumonda, ha il suveran d’Engiadin’Ota er da decider davart l’iniziativa da la PPS inoltrada dal 2010. Tenor quella na duai il circul betg esser activ en chaussa fusiun, avant che la populaziun n’è betg vegnida dumandada. E finalmain ha il votant er anc dad inditgar tgenina da las duas propostas ch’el favurisass en cas che tuttas duas propostas vegnissan acceptadas.
