L'emprim num per la cursa al timun da la vischnanca da San Murezzan è public – Adriano Iseppi ha annunzià cun in video en las medias socialas ses interess per daventar president communal. L'expert da passlung cun annada 1973 lavura actualmain sco trenader e coordinatur da sport a la Scoula sportiva a Champfèr, la scola da talents da San Murezzan.
Uss saja il dretg mument per far in nov pass en la vita, ha Iseppi ditg envers RTR areguard sia candidatura ch'el fa sco independent. El veglia porscher in'alternativa als votants ed a las votantas da San Murezzan – el na crititgeschia dentant betg la lavur actuala. Iseppi vul proseguir cun ils projects gia instradads, e s'engaschar per ina buna finanziaziun da quels. Ed era esser qua per la populaziun indigena.
In discurs che RTR ha fatg l'onn 2009 en il rom da l'emissiun Tavulin:
Resta Jenny sin la tribuna politica?
Sch'il president actual da San Murezzan Christian Jott Jenny candidescha per ina ulteriura perioda d'uffizi u betg – n'ha el betg anc decis. Quai ha Jenny ditg envers RTR. Il 2019 ha el surpiglià il timun da la vischnanca, suenter in cumbat electoral cunter il president d'enfin lura Sigi Asprion. L'onn 2022 ha il suveran da San Murezzan lura reelegì Christian Jott Jenny.
L'elecziun dal presidi communal da San Murezzan è planisada ils 14 da zercladur 2026. Sch'in segund scrutini è necessari, duess quel esser ils 19 da fanadur.
