A San Murezzan n'ha nagin dals trais candidats per il presidi communal cuntanschì il pli absolut da 702 vuschs, scriva la vischnanca. Ad Adriano Iseppi cun las bleras vuschs mancan 59 vuschs per l'elecziun. Las vuschs èn repartidas sco suonda:
- Adriano Iseppi (senza partida): 643 vuschs
- Isabel Wenger (Next Generation): 441 vuschs
- Sebastian Bahner (senza partida): 320 vuschs
La participaziun a la votaziun è tar stgars 64%. Il segund scrutini è ils 19 da fanadur 2026. Enfin ils 17 da zercladur èsi pussaivel d'inoltrar candidaturas. Ils trais candidats Iseppi, Wenger e Bahner sa mettan tuts a disposiziun per il segund scrutini, quai han els ditg sin dumonda da RTR.
Isabel Wenger: Emprima presidenta
A San Murezzan vul Isabel Wenger daventar l'emprima presidenta communala. Ella fa gia oz part dal parlament da San Murezzan.
- La dunna da 59 onns è dapi il 2022 en il cussegl communal da San Murezzan.
- L'economa è cussegliadra independenta è durant onns stada responsabla da marketing e projects strategics tar la Clinica Gut.
- Ella veglia tranter auter s'engaschar per spazi da viver per indigens sco er segirar il provediment medicinal.
L'onn passà ha ella presidià il parlament. Dapi il mars è ella presidenta dal cussegl da sanadad da l'organisaziun da sanadad regiunala Sanadura.
Politica sur ils cunfins da partida
Isabel Wenger s'engaschia per ina politica che guardia sur ils cunfins da partidas, scriva ella en ina communicaziun. Ses puncts centrals cumpiglian la garanzia dal provediment da la sanadad, la tgira da senioras e seniors, dapli spazi d'abitar per indigens, la promoziun da plazzas da lavur durant l'entir onn sco er ina politica communala pli chapibla e transparenta.
Sebastian Bahner sco segund candidat en il cumbat electoral
Stgars 10 dis suenter ch'il president en uffizi ha annunzià ch'el na candideschia betg pli per ina terza perioda, ha Sebastian Bahner annunzià sia candidatura. Quai è stà da leger en la Posta Ladina.
- L'um da 46 onns è bab da duas figlias e viva cun sia famiglia a San Murezzan.
- En sia carriera professiunala ha el gia gì diversas rollas da manar cumplexas cun focus strategic, organisatoric e finanzial.
- Sias experientschas veglia el ussa duvrar en favur da la vischnanca per sviluppar quella vinavant sco lieu da viver da lavurar e per l'economia.
La decisiun da candidar haja el piglià suenter lungas ponderaziuns e divers discurs cun exponents da la politica, economia e da l'administraziun. I saja stà impurtant per el da sa far in maletg cumplessiv da las sfidas avant che sa decider da candidar.
Basegns da la populaziun, cler timun e dialog en il focus
Sebastian Bahner vul metter en il center ils basegns da la populaziun, guardar per ina administraziun ferma, ina cler timun politic ed in dialog avert cun tut las gruppas d'interess. Tenor l'um ch'è gugent da viadi en ils culms e s'engascha per la secziun Bernina dal CAS saja San Murezzan posiziunà bain ed i valia da sviluppar vinavant la ferma identitad a moda raschunaivla.
Adriano Iseppi emprim candidat per il presidi da San Murezzan
Mez mars è in'emprima candidatura vegnida enconuschenta: Adriano Iseppi ha annunzià ses interess per il post.
L'emprim num per la cursa al timun da la vischnanca da San Murezzan è public – Adriano Iseppi ha annunzià cun in video en las medias socialas ses interess per daventar president communal.
- L'anteriur profi da passlung da 53 onns viva cun sia famiglia a San Murezzan.
- Dus onns è Iseppi stà il schef dal passlung tar Swiss-Ski, dapi il 2016 è el manader da la cursa tar il Maraton da skis engiadinais.
- Adriano Iseppi veglia porscher in'alternativa al pievel. El vul proseguir cun ils projects gia instradads e s'engaschar per ina buna finanziaziun da quels. Ed era esser qua per la populaziun indigena.
L'expert da passlung cun annada 1973 lavura actualmain sco trenader e coordinatur da sport a la Scoula sportiva a Champfèr, la scola da talents da San Murezzan.
Uss saja il dretg mument per far in nov pass en la vita, ha Iseppi ditg envers RTR areguard sia candidatura ch'el fa sco independent. El veglia porscher in'alternativa als votants ed a las votantas da San Murezzan – el na crititgeschia dentant betg la lavur actuala. Iseppi vul proseguir cun ils projects gia instradads, e s'engaschar per ina buna finanziaziun da quels. Ed era esser qua per la populaziun indigena.
In discurs che RTR ha fatg l'onn 2009 en il rom da l'emissiun Tavulin:
L'elecziun dal presidi communal da San Murezzan è planisada ils 14 da zercladur 2026. Sch'in segund scrutini è necessari, duess quel esser ils 19 da fanadur.
Jenny na vul betg far ina terza perioda d'uffizi
Il president communal actual da San Murezzan, Christian Jott Jenny, na candidescha betg per in ulteriur temp d'uffizi. Quai ha l'um da 47 communitgà il prim d'avrigl envers radio SRF.
Christian Jott Jenny è in chantadur, entertainer, producent svizzer. Il 2007 ha el lantschà il Festival da Jazz a San Murezzan ch'el ha manà fin a sia elecziun surprendenta sco president da la vischnanca da San Murezzan.
Jenny è dapi il 2019 president communal ed è vegnì reelegì en uffizi il 2022. Per ina terza perioda na veglia el betg pli candidar.
Jau crai che politichers chalan plitost memia tard che memia baud. Jau na less betg esser in da quels che mulestan il pievel in di.
