Peder Caviezel lavura actualmain tar l’Uffizi da construcziun bassa a Scuol. L’um che stat curt avant la pensiun ha annunzià da vulair reducir ses pensum tar il chantun. Caviezel daventa successur da Victor Peer. Suenter 40 onns politica da vischnanca aveva quel decis da chalar sco president communal da Valsot.
Peder Caviezel il manader dal manaschi tar il district 4 tar l'Uffizi da construcziun bassa è sa preschentà sco candidat per la schelta. Quai suenter che diversas persunas da la vischnanca hajan contactà el per al promover da candidar. El è creschì si en la regiun ed abita dapli che 40 onns a Ramosch
Cuminanza ed interess politic communal èn impurtants
El vul purtar vinavant il projects currents da la vischnanca e be far pitschens midaments vidlonder – ed er quai be là, nua ch'i fa basegn, ha el gì ditg durant il cumbat electoral.
I na fa betg basegn da midar bler, surtut betg quai che funcziuna.
Pli impurtant saja per Peder Caviezel da promover dapli glieud da far part al process politic en vischnanca. Quai vul el realisar cun esser pli damanaivel a la glieud ed avair ureglias avertas per tut ils abitants ed abitantas.
Blera glieud è sa retratga e na fa betg pli part en la cuminanza dad ina vischnanca da passa 1'000 abitants – e quai è putgà.
Il cuntracandidat
Fadri Riatsch, pur da 48 onns, abita cun sia famiglia a Vnà, ina fracziun da Valsot. Ils proxims onns prevesa el da surdar la puraria a ses figl Gino.
Il spazi da viver per indigens è il tema central nua ch’el avess mess accents. Actualmain prevesa la vischnanca da bajegiar or da la scola da Ramosch ina chasa d’abitaziuns per indigens, plinavant prevesan ins era da far adattaziuns enturn la zona d’industria che maina plazzas da lavur. A Tschlin è vegnì lantschà in project che vul promover la cultura da musica e sco actual responsabel per la construcziun vul el manar la planisaziun locala finalmain tras tut las instanzas.
