L’unica discussiun da podium tranter ils dus candidats per il presidi da San Murezzan per la proxima legislatura da quatter onns ha procurà per ina sala plaina en l'Hotel Reine Victoria.
Concurrenza per il president communal en uffizi, Christian Jott Jenny, datti da Martin Binkert. Entant ch’il commember da l’Allianza dal Center aveva gia annunzià sia candidatura il november da l’onn passà, ha Jenny inoltrà per ina segunda legislatura pir l’ultim mument pussibel. Quai er per evitar gieus politics durant plirs mais.
Dus mais cumbat electoral intensiv tanscha.
- 43 onns
- naschì e creschì a Witikon en la citad da Turitg
- chantadur d'opera da professiun
- fundatur dal Festival da Jazz a San Murezzan
- sa preschenta sper ses uffizi da president communal er sco artist
- candidescha per ina segunda perioda d'uffizi sco candidat independent
Auter ch'il tun persunal e per part dir en numerusas chartas da lecturs las ultimas emnas, è la discussiun en sala tranter Martin Binkert e Christian Jott Jenny stada main tendida e restada manieraivla.
Ils votants e las votantas èn creschidas avunda per savair giuditgar tge ch’è vair e tge betg.
- 51 onns, maridà e bab da dus uffants
- creschì si a San Murezzan ed a Champfèr
- manader tecnic e commember da direcziun da la plazza aviatica a Samedan
- da nov deputà dal Cussegl grond per l'Allianza dal center
- dapi il 2020 en il cussegl communal da San Murezzan
Durant la discussiun da podium han ils dus candidats piglià posiziun davart temas e dumondas enconuschents sco: il turissem, la mancanza da lieu abitabel per indigens u er il pensum dal president communal. Actualmain è quel tar 80%. In fatg che na plascha betg a mintgin.
Sa mussà èsi durant la discussiun che la populaziun da San Murezzan ha cun ils dus candidats en cursa ina schelta. Quai tranter ina cuntinuaziun cun Christian Jott Jenny e ses stil da politisar nunconvenziunal u cun «il nov» Martin Binkert, el che vuless s’engaschar cun in pensum da 100% ed uschia er procurar per dapli quietezza e structuras claras en la vischnanca.
Da decider tgi che vegn a manar la vischnanca ils proxims quatter onns ha il suveran da San Murezzan ils 12 da zercladur 2022 a l’urna.