La Partida populara svizra PPS da San Murezzan ha communitgà ch’ella veglia sustegnair tar il segund scrutini il president communal en uffizi Sigi Asprion. Fin uss n’aveva la partida vulì dar ina recumandaziun ad in dals dus candidats senza partida.
PLD consternada dad agir da Jenny
Sco ch’il president da la PLD San Murezzan Leandro Testa ha declerà ad RTR, sajan els consternads da l’agir da Christian Jott Jenny. Il fatg ch'el sa mettia encunter represchentants da las singulas partidas irriteschia.
Jenny ha numnadamain preschentà sco ses team a trais novas persunas independentas per in sez en la suprastanza communala – quai senza menziunar ils dus cussegliers existents Michael Pfäffli (PLD) e Regula Degiacomi (PLD). Leandro Testa tema che la constellaziun cun bunamain be novs candidats pudess bloccar tut la lavur en la suprastanza.
Independents sa dostan er
Nagina recumandaziun uffiziala vul dar la Gruppa dad independents. Quai ha confirmà il pledader Arno Wyss. Dentant s’exprima el persunalmain en ina charta da lectur davart sia tema ch’ins na duess betg midar or in entira equipa d’ina bartga. Il privel che quella sa muventa be pli enturn sa sez, saja gronda.
Il segund scrutin per il sez da president communal a San Murezzan è ils 7 d’october. In’emna pli tard vegn occupada da la executiva, en furma da la suprastanza communala.
RR novitads 17:00+
