Embellir plazza communala e stgatschar il traffic public?

Cun l'inauguraziun dal sviament vul Silvaplauna dar nova vita al center da la vischnanca. Planisà è dad engrondir ed embellir la plazza communala e da betg pli laschar circular il traffic public tras vischnanca.

Legenda da maletgsNua ch'il traffic passa oz tras Silvaplauna duai en avegnir envidar ina gronda plazza da star en cumpagnia.

Ina gruppa da lavur cun agid da l'Academia Engiadina ha skizzà diversas pussibilitads per revitalisar ed embellir il center da vischnanca suenter ch'il sviament è en funcziun la stad 2018. Vegnir realisà duai «Silvaplauna Vital» che prevesa dad engrondir la plazza communala e da salaschar ella cun crappa dal Güglia.

Tenor il president communal Daniel Bosshard duain vegnir organisads concerts, teaters, martgads u autras occurrenzas sin la plazza per dar vita ad ella.

Legenda da maletgsplazza communala Silvaplauna Legenda da maletgsmad

Concept da traffic dispitaivel

Cun la realisaziun da la nova plazza duai era il traffic public vegnir spustà sin la via chantunala. Ils bus na duain damai betg pli passar tras vischnanca, mabain sa fermar tar il campadi e tar la rundella tranter Silvaplauna e Surlej.

Quai dat dentant critica. Pliras persunas s'expriman en chartas da lecturs encunter il plan da «stgatschar il traffic public or da la vischnanca».

Il president communal respunda, ch'il bus saja bain circulà il passà tras vischnanca, haja dentant fermà mo en dus lieus: en vischinanza dal campadi e tar la posta. En quai senn na sa midia betg bler è el persvas. En pli duai in bus electric vegnir prendì en funcziun, ina sort shuttle che passass tras vischnanca e purtass la glieud era tar las fermadas dal traffic public.

Credit da 5,35 milliuns francs

Cun las lavurs duai vegnir cumenzà il di suenter l'inauguraziun dal sviament. Suenter radund quatter mais duain quellas esser a fin uschia che la nova plazza e las novas fermadas da bus fissan prontas sin la stagiun d'enviern 2018/19.

L'entir project custa 5,35 milliuns francs e cuntegna la sanaziun e l'engrondiment da la plazza communala e la construcziun da la nova fermativa per bus Mandra/Camping. Il suveran decida il mardi saira.

RR actualitad 07:00