L'avrigl da quest onn aveva la vischnanca da Scuol incumbensà ina giuria da la fracziun da Guarda da realisar ina concurrenza per embellir la nova rundella da Guarda. 13 propostas èn entradas e da quellas ha il project da l’artist Gianin Conrad da Domat fatg la cursa. Sia idea fiss stada dad installar trais saivs da segirezza ina sur l’autra e colurar quellas en grisch, verd e blau – uschia sco las colurs da la natira.
Nagin art – in project da natira per la rundella da Giarsun
La vischnanca da Scuol, oravant tut la suprastanza, ha constatà bain spert ina tscherta sceptica envers quest project – ed ha midà idea.
Uss è la suprastanza communala da Scuol sa decidida definitivamain per in auter project: Realisada vegn la proposta da l’architect Urs Padrun da Guarda. Quella prevesa d'adattar la rundella als conturns ed ornar ella cun plantas, bostga e crappa natirala.
Scuol conceda sbagls
Tenor Christian Fanzun, il president communal, avess ins forsa stuì reglamentar pli fitg las reglas per realisar la concurrenza. Finalmain hajan ins chattà la storta e chattà tuttina anc ina soluziun cun la quala er la giuria saja perencletga.
RR actualitad 07:00