Siglir tar il cuntegn

Engiadina Emprender 18 imnis per ils campiunadis mundials

En occasiun dals campiunadis mundials da skis en Engiadina il favrer 2017, duai in chor da l’Academia Engiadina Samedan chantar live tar mintga premiaziun da las cursas l'imni dal pajais dal victur u da la victura.

Legende: Video Academia Engaidina ed ils imnis abspielen. Laufzeit 1:16 Minuten.
Or da RTR dals 18.11.2016.

Radund 30 scolaras e scolars da l'Academia Engiadina Samedan èn s'annunziads per il project. Entant che tuts èn gia ussa fieu e flomma per l’idea da chantar ils imnis sin la «Medal Plaza» empè da laschar ir las melodias giu d’in portatun, n’è il dirigent Werner Steidle l’emprim betg stà persvas da l'idea.

Ramassar notas e texts

Entant sajan ins sin buna via d'almain survegnir ils texts e las notas dals 18 pajais che l’organisaziun dals campiunadis mundials da skis San Murezzan 2017 han definì sco pajais cun victurs potenzials d’ina cursa.

Agid ord la rait

Per savair, co pronunziar ils texts en las linguas estras, vul Werner Steidle era consultar la rait e laschar tadlar ils scolars ils imnis. Anc n’ha il chor betg tut ils texts e las notas sin maisa. Grond respect han ils chantadurs surtut dals imnis da la Russia e da la Finlanda. Pli datiers è percunter l’imni american.

Benedicziun da la FIS per project

Cun quai ch’il cor spezial ha da chantar bunamain mintga saira ina giada live a San Murezzan, vuless'ins parter ils scolars en duas gruppas. Entant sajan ins pir al cumenzament dal project, ha suttastritgà il dirigent engaschà. Per pudair realisar il project han ils organisaturs l’emprim gì da dumandar in permiss da la FIS.

RR actualitad 06:00

Ils imnis da trenar

  • Svizra
  • Principadi da Liechtenstein
  • Austria
  • Italia
  • Frantscha
  • Germania
  • Norvegia
  • Svezia
  • Finlanda
  • Stadis Unids
  • Canada
  • Slovachia
  • Slovenia
  • Croazia
  • Tschechia
  • Ungaria
  • Russia
  • Gronda Britannia