Il resultat final na saja nagina surpraisa ha Franco Tramér, il president dal cussegl d'administraziun da la Diavolezza Lagalb SA declerà als acziunaris en il Rondo a Puntraschigna. Passa dus milliuns francs èn vegnids investids en renovaziuns da las staziuns e revisiuns da las pendicularas.
En pli sajan las frequenzas durant l'enviern 17/18 stadas mediocras, surtut pervia da la trid'aura durant las fin d'emnas.
Reanimaziun club 8848
L'enviern 18/19 ha la Diavolezza Lagalb SA pudì augmentar las frequenzas per bundant 10%. Quai era grazia a la reanimaziun dal club 8848 sin la Lagalb. Commember daventa tgi che fa 11 giadas la descensiun e chamina 4 giadas sin il piz durant in di. Passa 600 commembers ha il club gudagnà quest enviern.
Tegnair l'enviern - fabritgar ora la stad
Per l'avegnir vul la Diavolezza Lagalb SA tegnair las cifras da l'enviern ed augmentar quellas da la stad. Quai surtut cun attrair gruppas.
Emprim onn suenter barat da muntognas
L'emprim da zercladur 2017 han la Diavolezza Lagalb ed il Piz Nair barattà possessur. Il Piz Nair tutga dapi lura a l'Engiadina Mountains SA, la Diavolezza e la Lagalb vegnan da nov gestiunadas ensemen cun la Corvatsch SA. Quest barat da muntognas era vegnì fatg per salvar la Lagalb suenter che l'Engiadina Mountains SA vuleva serrar ella.
RR novitads 17:00
