La fusiun operativa da las trais pendicularas Corvatsch, Diavolezza e Lagalb haja signifitgà in grond midament da las structuras da gestiun, ha confermà il manader Markus Moser. L’organisaziun saja entant verifitgada, la collavuraziun saja gia bler pli stretga e productiva.
Pass emoziunal vul pli ditg
Fin ch’il midament da las structuras è propi er tar ils emploiads, dovri bler pli ditg che be ina stagiun d’enviern sin il palpiri. Markus Moser discurra ord experientscha. Dal 2007 aveva la Corvatsch SA fusiunà cun la societad da Furtschellas. Anc oz dettia situaziuns nua ch’i vegn differenzià en ils chaus tranter las duas muntognas.
Anc nagina successiun per Jurt
Betg anc cler è sche insumma e tgi che vegn a remplazzar Alois Jurt, il president dal cussegl administrativ, ch'è mort l’october 2017. Sco Franco Tramèr ha infurmà ils acziunaris a la radunanza generala da la Corvatsch SA, na haja la famiglia Jurt anc betg fatg propostas. Per il mument furman nov Emilio Bianchi e Christoph Klemm sco represchentant da la famiglia Niarchos, sco vicepresidents in’unitad en il cussegl administrativ, Franco Tramèr vegn ad avair il presidi. Suenter plirs onns è puspè represchentada la vischnanca da Silvaplauna cun in delegà, quai en la persuna dal president communal Daniel Bosshard.
Puspè in enviern senza naiv
Il rendaquint da la Corvatsch SA 2016/17 serra suenter ina stagiun d’enviern cun fitg pauca naiv cun ina sperdita da 1,33 milliuns francs. Decisiv saja anc adina l’aura ed il curs dal franc svizzer en congual cun l’euro, ha suttastritgà Franco Tramèr, commember dal cussegl administrativ da la societad.
Segirar pista «Lej dals chöds»
Il proxim project che la societad vul realisar è la segirada da la pista da «Lej dals chöds» fin a San Murezzan Bagn cun in’installaziun da far naiv. Entant manchian dentant anc tut las lubientschas da possessurs e da l'organisaziun per la protecziun da l’ambient.
