Erwin Graf da Cuira è dapi ch'el ha 14 onns en la sutga cun rodas. El ha ina paralisa causa malatia. Per l'acziun «Gipfelstürmer» dal portal online Paraforum ha Erwin Graf testà quant bain ch'ins arriva en la funiculara si Muottas Muragl.
Il Paraforum vul uschia motivar persunas cun in handicap da far excurisuns, era en muntogna. Erwin Graf ha constatà ch'il viadi en la funiculara è fitg intensiv pervia da la gronda pendenza. Sin la muntogna è dentant tut stà endrizzà fitg bain per ina persuna en ina sutga cun rodas.
Nus faschain tut il pussaivel.
Per las pendicularas Engiadina Mountains n'èsi betg simpel da garantir l'access a persunas cun in handicap si Muottas Muragl, quai ha ditg il mainagestiun Markus Meili envers RTR. Bain è il hotel ch'è vegnì renovà be avant paucs onns fitg modern e correspunda a tut las pretaisas da la lescha per persunas cun in handicap. Dentant è la funiculara dal onn 1907 e qua na pon ins betg renovar u modernisar senza obligaziuns. La funiculara stat per exempel sut protecziun da monuments.
