Gievgia ha entschet l’exposiziun da mastergn che vegn organisada mintga trais onns da la scola professiunala da Samedan. L’exposiziun preschenta radund 50 differentas professiuns. La finamira è da far gust e da mussar la varietad da professiuns ch’existan en Engiadina ed en Val Müstair. Betg mo a giuvenils interessads, mabain era a lur geniturs.
Era giuvenils e geniturs ord l’exteriur en il focus da l’exposiziun
Ord mancanza da buns emprendists indigens ha la scola professiunala da Samedan lantschà inserats en gasetta e spots da radio en Vuclina ed en il Tirol dal Sid. Ils inserats rendan attent a l’exposiziun a Samedan. La scola vul uschia per l’ina cumbatter il regress dad emprendists indigens e per l’autra mantegnair il dumber da scolars per classa.
Damain emprendists - in problem en tut il Grischun
En il Grischun porschan per il mument 3’200 manaschis emprendissadis en differentas clamadas. Tenor l’Uffizi per la furmaziun professiunala grischun devi la stad 2015 en Grischun 1798 plazzas d’emprendissadi. Fin la fin da favrer da quest onn eran mo 1112 occupadas. Uschia èn 686 plazzas libras.
Per Justina Simeon-Cathomas, manadra da partiziun cussegliaziun professiunala ha quest svilup differents motivs:
- La purschida n’è betg adina congruenta cun ils giavischs dils giuvenils.
- Per plirs giuvenils èn las pretensiuns da las clamadas per part memia grondas.
- Durant ils ultims onns ha sa sbassà il dumber da giuvenils marcantamain. Plazzas d'emprendissadi datti dentant anc adina tuttina bleras.
Betg l'empirma giada
Problems da chattar emprendistas ed emprendists ha er gia da ils ultims onns. Quai mussa la contribuziun dal Telesguard dals 15-06-2011: