Siglir tar il cuntegn

Header

cuntegn

Engadin Airport Partir ed atterar da nov pussibel er da trid'aura

Quests dis è vegnì introducì il nov sistem da navigaziun a la plazza aviatica da Samedan. Cun quel pon aviuns partir ed atterar er tar schletta vista.

Durant il campiunadi mundial da skis 2017 è il sistem da navigaziun IFR vegnì testà a la plazza aviatica da Samedan. Suenter bunas experientschas ed intginas correcturas vi dal sistem è quel uss vegnì introducì definitivamain.

Per Martin Binkert, manader dal project da l'Engadin Airport èsi la finiziun dad in project ch'ha cumenzà dal 2012. El è perquai cuntent da finalmain pudair introducir il sistem. Ed era il pilot e CEO dad Air Corviglia, Duri Joos, sa legra.

video
Nov sistem da navigaziun a la plazza aviatica da Samedan
Or da Telesguard dals 09.12.2019.
laschar ir. Durada: 3 minutas 13 Secundas.

Dapli segirezza per giasts

Enfin da qua han aviuns be pudì atterar e partir cun buna vista. Perquai èsi adina puspè stà uschia che aviuns han bain pudì atterar, ma betg pli partir perquai che l'aura era vegnida pli trida. Cul nov sistem che nizzegia datas da satellit pon ins evitar quai.

Il sistem prenda squitsch da pilots e giasts, quai che maina ad ina tscherta calma en il manaschi.
Autur: Martin Binkert Manader da project, Engadin Airport

Uschia n'è l'aura pli nagin u mo pli in pitschen factur che decida, sch'ins po vegnir en Engiadina cun l'aviun u betg.

Sgol tschorv betg pussaivel

Il sistem da navigaziun ha dentant cunfins. El maina bain ils aviuns era senza vista en la val, per atterar ston ils pilots dentant vesair la pista. Ed era tar la partenza sto esser dada ina tscherta vista.

Cun l'introducziun dal nov sistem na ston pilots betg pli avair ina permissiun speziala per atterrar sin la plazza aviatica a Samedan. Quai era fin uss ina premissa, pervia da la topografia e la termica.

audio
Mezdi: Plazza aviatica Samedan: introducziun dal nov sistem da sgular
ord Actualitad dals 09.12.2019.
laschar ir. Durada: 2 minutas 54 Secundas.

RTR actualitad 12:00

Artitgels legids il pli savens