Trais discussiuns – trais giadas era il tema la speranza. Trais giadas era il tema dentant era la politica. Speranza en pajais nua che la politica è encunter la libertad dals umans. En la DDR, nua che Joachim Gauck è creschì si, en China, nua che Ai WeiWei è creschì si. La survista en general ha Kenneth Roth dà, ch'era schef da Human Rights Watch. La conclusiun: la speranza è in sentiment fitg persunal.
Surtut ils cristians eran quels ch'han cret ad in midament. Jau crai dentant ch'ins dovra in minz intern che permetta ad ins da sperar pli ditg.
Joachim Gauck per exempel è creschì si en la DDR, en ina dictatura, senza dentant sa participar e partir las ideas da quella. El haja emprendì a scola da las bellezzas dal socialissem, ses bab dentant saja vegnì deportà en Sibiria senza che sia famiglia fiss vegnida infurmada. Il cuntrast era damai grond ed avessi era pudì chaschunar tar el per bler dapli malsegirezza. Tuttina di el, ch'el n'haja mai pers la speranza, grazia a sia cretta.
Sche ti n'has betg speranza na ta sentas era mai senza speranza.
Ai WeiWei pecunter n'ha mai pers la speranza, perquai ch'el n'ha mai gì ella. L'artist chinais aveva cumenzà dal 2005 a scriver in blog davart art e cultura, ha en quel era adina puspè crititgà il reschim. Il blog è perquai vegnì bloccà dal 2009. Tuttina era questa pussaivladad per el sco ina miracla, ha el raquintà a Zuoz, perquai ch'igl era l'emprima giada ch'insatgi haja crititgà publicamain il stadi e ch'ins haja pudì leger quai libramain. Ai Weiwei ha dentant era raquintà sco el haja constatà che far retschertgas davart temas, sco per exempel chasas da scola crudadas ensemen durant il terratrembel 2008 a Sichuan, haja la pli gronda pussanza insumma.
Dumandà sco el creass insatge cul tema speranza di l'artist e dissident – el era dal 2011 plirs mais en praschun ed ha pudì viagiar pir dal 2015 or dal pajais – che speranza funcziuni per el mo cun la cuntrapart – cun la desperaziun.
Art cunter il reschim
Kenneth Roth, ch'era 30 onns schef da Human Rights Watch, ha mussà si l'istorgia d'art en dictaturas ni guerras. Saja quai Picasso, ch'ha dissegnà l'orrur da la guerra, sajan quai purtrets istorics da guerras, saja quai Banksy cun ses purtrets en l'Ucraina ni Pussy Riot en ina baselgia ortodoxa en Russia. Dentant era ils uschenumnads «white-paper-protests» en China. Ina furma creativa da protestar cun fegls alvs cunter in reschim che scumonda mintga furma da protest.
L'art reflectescha la libertad interna che mintgin da nus ha, che dictaturs na pon mai supprimer.
Engadin Art Talks – in'occurrenza exclusiva
Ils Engadin Art Talks han gì lieu quest onn per la 12avla giada. L'occurrenza è stada da prima davent ed è restada fin oz exclusiva. Mo 300 persunas pon sa participar. Dasper artistas ed artists cun renum internaziunal sa participeschan era architectas ni collavuraturs da chasas d'aucziuns. Per Zuoz è l'occurrenza impurtanta. Sco il vicepresident Ramun Ratti ha ditg envers RTR èsi daventada ina da las occurrenzas principalas ch'han lieu durant l'onn a Zuoz.