Pronts per manar tras l’emprim Engadin Ultra Trail fissan ils organisaturs stads gia l’onn passà. Pervia da corona han ins lura però stuì spustar l’eveniment per in onn. En in mais èsi uss uschè lunsch. Tranter Samedan e Zuoz datti quatter cursas da differentas distanzas (16 km, 23 km, 53 km e 102 km).
Traject pretensius
Il traject roial dal Engadin Ultra Trail maina sur sendas e muntognas da Samedan fin a Zuoz e puspè enavos. Las curriduras ed ils curridurs curran 102 kilometers – quint fa Reto Franziscus, il president dal Engadin Ultra Trail ch’i dovrian var 26 uras. Tenor Franziscus èsi stà ina gronda sfida da chattar in traject adattà. La segirezza da tuts stoppia numnadamain adina esser garantida.
Il punct il pli aut è tar 2’800 meters sur mar. Tar mintga lieu ch’è sur 2’500 meters vain nus stuì definir in traject alternativ. Uschia ch’ins po sviar en cas ch’i dat in privel.
Partir sin agen ristg
Las participantas ed ils participants dal Engadin Ultra Trail partan sin agen ristg. Quai è definì tenor Reto Franziscus cleramain en il reglament. Tuttina vegn mintgina e mintgin controllà avant ch'el u ella parta. Tuts duain numnadamain avair il material prescrit cun sai.
Sfida da chattar voluntaris
Per las controllas a la partenza ed er sin il traject dovri divers gidanters. Quai saja ina gronda sfida, di Reto Franziscus. Ils servetschs èn da lunga durada, perquai che la cursa roiala dura sur in di. Il president da l’organisaziun è però da buna speranza da chattar avunda gidanters per tut las cursas dal Engadin Ultra Trail.