Cun il cumià da las duas comanadras da la partiziun da tgira Elke Bönicke (37 onns en la organisaziun) e Meta Thalmann (17 onns en l'organisaziun) è la Fundaziun per il provediment da sanadad Engiadin'Ota (SGO) sa decidida da far midadas en la structura dal manaschi.
Midadas necessarias per il directur general ad interim
Per Rolf Gilgen, il directur general ad interim da la SGO, ha l'organisaziun decis da divider la sparta da tgira. Ina è da nov responsabla per la tgira en l’ospital regiunal - e l’autra per la tgira en las duas chasas d’attempads a Samedan ed a San Murezzan. Tuttas duas spartas da tgira èn uss era represchentadas en la direcziun da la SGO.
La tgira a lunga durada e las duas chasas d’attempads a Samedan e San Murezzan duain avair ina vusch pli ferma en la direcziun.
Ad interim, pero capabel d’agir
Dentant en las duas plazzas per la tgira en la direcziun gia occupadas, sche era be ad interim. Cun Giovanni D’Ambrosio e Marco Oesch sajan ins capabel d’agir, ed ins haja chattà duas persunas capablas, di Rolf Gilgen. Quai almain fin ch’ins chattia persunal fix. Uschia possian ins però era procurar per in manaschi da fatschenta che funcziuna era da temp cun bleras sfidas ed intschertezzas per tut l’organisaziun da la SGO.
Pensums datti blers da far. In central è da garantir il provediment da sanadad en l'Engiadin'Ota, suenter che la cunvegna da prestaziun actuala scada quest onn. Surtut era suenter che la populaziun ha ditg na a la proposta d'integrar l'Ospital a Samedan en l'Ospital chantunal.