Siglir tar il cuntegn

Header

cuntegn

Engiadin'Ota Nov dachasa per l’archiv cultural

Dapi 30 onns ramassa l’archiv cultural da l’Engiadin’Ota documents sur da la cultura da la populaziun engiadinaisa. Ils documents ed objects nundumbraivels èn archivads enfin oz en las localitads da la chesa Planta a Samedan. Cun quai che l’archiv crescha ad in crescher, èn las localitads a Samedan però daventadas massa pitschnas. Uss han ils responsabels da l’archiv cultural chattà in nov dachasa en la chesa Planta a Zuoz.

Renovaziun totala

La chasa ch’è passa 400 onns veglia stat numnadamain gia plirs onns vida e duai ils proxims onns vegnir renovada. Cun quest’occasiun è la famiglia von Planta sa decidida d’integrar en avegnir l’archiv cultural da l’Engiadin’Ota.

Per nossa famiglia e la fundaziun èsi fitg impurtant che nossa chasa stat a disposiziun al public. In meglier fittadin che l’archiv cultural na pudessan nus chattar.
Autur: Conradin von Planta president fundaziun von Planta

La renovaziun totala da la chesa Planta a Zuoz custa var 5.5 milliuns francs. Prevesidas èn duas abitaziuns privatas, e la part publica nua che l’archiv cultural duai vegnir. Quella part custa var 2.1 milliuns francs. Finanziada vegn la sanaziun da pliras fundaziuns.

Midada l’onn 2023

Sche tut va tenor plan, duai en in proxim pass vegnir inoltrada la dumonda da fabrica tar la vischnanca. Uschia che las lavurs da construcziun pudessan cumenzar anc quest onn. Prevesida è la midada da l’archiv cultural d’Engiadin’Ota da Samedan a Zuoz l’onn 2023.

audio
La chesa Planta a Zuoz duai daventar il nov dachasa per l’archiv cultural d’Engiadin’Ota
ord Actualitad dals 25.08.2020.
laschar ir. Durada: 3 minutas 1 Secunda.

RTR actualitad 12:00

Artitgels legids il pli savens