La plaiv evangelica da l’Engiadin’Ota quinta total 22 baselgias, diversas chasas pravendas, terren da fabrica e prads tranter Segl e S-chanf. L’obligaziun da la raspada è da mantegnair las immobiglias. Gist tar las baselgias, per part anticas, possia però dar adina puspè surpraisas che van en ils raps e surpassan la fin finala il budget. Per avair ina survista dals custs e per diminuir quels en l'avegnir, vul la baselgia evangelica uss elavurar ina strategia d’utilisaziun d’immobiglias, uschè Gian Clalüna, il president da Refurmo.
Ponderar da vender baselgias
Ina dumonda centrala è sch'i dovra 22 baselgias en 11 vischnancas. Perquai vul ins prender sut la marella en in emprim pass tschintg vischnancas. Numnadamain quellas nua ch’i dat dapli ch'ina baselgia.
Per quai duain vegnir fundadas tschintg gruppas da lavur ch'elavuran differentas pussaivladads d’utilisaziun en futur. Pussaivladads pudessan esser da chattar partenaris cun dretg d’utilisaziun u perfin venditas da baselgias, di Gian Clalüna.
Er per las duas parcellas dal terren da fabrica a Samedan veglia ins reponderar l'utilisaziun. La proposta da la suprastanza saja clera da betg vender quellas a persunas privatas. Ina pussaivladad fiss però da vender a societads da construcziun en dretg da construcziun. Impurtant saja tenor Gian Clalüna da prender per mauns uss la tematica. Uschia ch'ins haja ina buna basa finanziala per l’avegnir.