Siglir tar il cuntegn

Header

lieu actual e futur da la stalla
Legenda: La nova stalla per chavagls è da nov a lur da la vischnanca da Champfèr Charta: Swisstopo, Grafica: RTR
cuntegn

Engiadina Engiadin'Ota: Via libra per center da cumpetenza per chavals

Questa revisiun pussibilitescha da translocar la stalla da chavaltgar Hossmann a Champfèr. Roman Hossmann e sia dunna possedan gia dapi il 1995 ina stalla amez la vischnanca. Quella è dentant betg pli confurma als basegns e memia pitschna.

Cun il gea da la populaziun da Silvaplauna a la revisiun parziala da la planisaziun locala pon ils Hossmanns uss ir in pass enavant ed inoltrar ina dumonda da construcziun.

Roman Hossmann è in optimist, di el da sasez. Pass per pass vegnia quai bun. El di dentant era: «Anc ina giada 12 onns na sun jau betg pli pront d'investir per restar en l'Engiadina.» Els sperian ch'en 1onn e mez saja fatg almain in cumenzament da la construcziun.

22'000 meters quadrat terren

Il nov lieu, ina parcella a l'ur da la vischnanca e datiers la via chantunala, è bler pli gronda ch' il terren ch'els han ussa. En il nov center da cumpetenza per chavals da l'Engiadin’Ota duai dar:

  • ina halla da chavaltgar silmain 40x20 meters gronda
  • 42 boxas per chavals
  • abitaziuns sin maximalmain 280 meters quadrat
  • plazza per pascular tatgà vi da las boxas
  • pasculaziun sin pastiras

Quant grondas che las investiziuns per il project èn, na vul Roman Hossmann betg dir. Il project na saja anc betg elavurà fin en ils detagls. Enfin uss è però gia investì radund in quart milliun francs. L'entir project duai vegnir finanzià privat.

halla da chavaltgar oz
Legenda: La stalla da chavals cun halla da chavaltgar oz - amez la vischnanca dapi l'onn 1995 RTR,V.Rominger

Pratica da veterinari cumplettescha il project

Era il veterinari da Segl, Toni Milicevic, vegn ad investir en ina nova pratica. I duai dar ina colliaziun tranter la stalla da chavals e la pratica. Uschia pon ins nizzegiar sinergias per ideas futuras.

Sco per exempel la purschida d'in lieu da reabilitaziun per chavals u er operaziuns pli grondas en la pratica. Pia optimar l'infrastructura per animals pitschens e stgaffir nova infrastructura per animals gronds.

RTR/vr

Artitgels legì il pli savens

Nach links scrollen Nach rechts scrollen