Engiadina - 200 chanuns da naiv spetgan sin temperaturas fraidas en Engiadina

Naiv n’è fin uss anc betg crudada dal tschiel e per producir naiv cun ils chanuns da naiv èn las temperaturas memia autas. Tut las installaziuns fissan prontas cun ils bun 200 chanuns e lantschas sin il territori da skis. Ed er l’aua è gia sin la muntogna.

Tut fiss pront

Cun il nov Lej Alv che las pendicularas Engiadina San Murezzan Mountains han realisà per 20 milliuns francs ils ultims dus onns èn era pronts 400’000 m3 aua per transmidar quella cun chanuns en naiv. L’unic che manca anc èn las temperaturas idealas d’almain -3 grads. Las previsiuns da l’aura annunzian uss per la fin d’emna naiv e temperaturas marcantamain pli bassas.

Mintga chanun ha in num

L’ennavada vegn manischada via computer davent da la centrala. Là surveglian ils responsabels di e notg la lavur da las maschinas. Ils radund 40 chanuns da la vart da Marguns han la particularitad ch’els portan mintgin in num feminin. Il num deriva da las partenarias u da las figlias d’ils emploiads sin la muntogna. Uschia poss'ins tranter en er sa lamentar senza offender la persuna, ha declerà Armon Godly, il manader da l’ennavada tar las pendicularas «Engiadina San Murezzan Mountains SA»

Spustà cumenzament da la stagiun per Marguns-Corviglia

Causa la mancanza da naiv han ins spustà l’avertura da la stagiun da skis per la regiun Corviglia Marguns per in’emna sin ils 28 da november. La stagiun è dentant gia lantschada dapi in mais cun la funiculara da la Diavolezza.