A partir dad oz vai anc 220 dis fin il campiunadi mundial da skis a San Murezzan. Dals 6 fin ils 19 da favrer 2017 vegnan spetgadas millis da persunas. Quai munta ina sfida immensa per la logistica. Part da questa fa il concept da traffic.
Bler han ils organisaturs pudì surpigliar da l'ultim campiunadi a San Murezzan ch'è stà il 2003. Quel haja funcziuna fitg bain, di il responsabel dad oz Thomas Kirchhofer.
Puncts centrals èn:
- calmar il traffic en vischnanca senza serrar giu el per tuts
- parcadis principals en las vischnancas vischinas Schlarigna e Champfèr
- finamira che 60% dals aspectaturs dovran ils meds da traffic publics
Ina tribuna, 16 meters auta
Quai vegn ad esser l'attracziun principala sin la plazza davant l'hotel Kulm:In monument en furma d'in skiunz, 16 meters aut. El furma la tribuna sin la plazza da l'hotel Kulm, la plazza principala durant l'entir campiunadi.
Cultura sco punct central
Sper la plazza da l'hotel Kulm duai la zona da peduns esser en il focus. Qua vegnan ad avair lieu preschentaziuns da musica, da teater e da prosa. Ed er la gastronomia indigena grischuna duai vegnir preschentada.
RR actualitad 07:00