Engiadina - Bartga Sassalbo arrivada bain en Lago di Poschiavo

Suenter il transport spectacular da la bartga sur il pass dal Bernina il settember 2015, ha la societad « Amici del lago » renovà e mess ad ir ils ultims mais la Sassalbo che ha entant stgars 100 onns. Per ils transferiment dal bastiment da la terra ferma en l’aua, ha pretendì ina bun’organisaziun e lavur da precisiun per posiziunar la bartga che ha in pais da 12 tonnas al gist lieu en il Lago di Poschiavo.

Finanziaziun tras amaturs dal lai

Per finanziar il project d’ina bartga, che duai attrair ils giasts en la Val Puschlav, han passa 50 persunas segnà aczias en la valita da mintgamai 2'500 francs. Il bastiment che deriva da Soloturn ha finalmain custà 70'000 francs.

Lavur voluntaria

Passa 1000 uras da lavur voluntaria hajan surtut pensiunads da la val investì en la restauraziun da la bartga, ha declerà in dals iniziants dal project, l’hotelier Marcello Gervasi. Surtut lur inschign saja stat remartgabel.

Scolaziun per guidar bartga

Per ch’ins possia era manischar la Sassalvo questa stad sur il lai da Poschiavo, che ha ina lunghezza da 2 kilometers, han ins era scolà ils novs chapitanis. Sut la batgetta dal manader da la bartga – el na vul betg sa numnar chapitani – ha René Stauffer instruì ils ultims mais ils futurs chapitanis da la Sassalbo.

Premiera è als 28 da matg 2016

Previs è che la bartga traffitgescha durant 135 uras sin il lai da Poschiavo durant l’emprima stagiun. Per preschentar il project a la populaziun, ha la societad «Amici del Lago» previs als 28 da matg l’inauguraziun uffiziala da la Sassalbo.