La vischnanca da Scuol ha publitgà in avis sin sia pagina d’internet cun l’infurmaziun che la populaziun haja da far quint durant las proximas emnas adina puspè cun helicopters che sgolan laina. Quels sgols sajan necessaris per cumbatter il bau-scorsa (Borkenkäfer). L’insect ha infestà diversas parts dal guaud sin il territori da Scuol. Pertutgà dal problem è dentant er la vischnanca da Valsot, scriva la FMR.
Er plantas saunas pertutgadas
Tenor Giorgio Renz, inschigner forestal tar l’Uffizi chantunal da guaud e privels da la natira a Scuol haja l’insect normalmain la funcziun dad ortulan per plantas deblas e malsaunas. Quest onn dettia dentant uschè blers gnieus che er plantas saunas vegnian infestadas dal bau-scorsa. Quantas plantas che hajan da vegnir allontanadas, na possia Renz anc betg dir per il mument.
Mesiras fan effect
Da tagliar e scursar la bostga infestada è l’unica pussaivladad per tegnair sut controlla la situaziun. La lescha forestala na permetta numnadamain betg da duvrar tissi cunter il bau-scorsa u auters insects nuschaivels. La situaziun saja entant pli stabila, grazia l’allontanament da pliras plantas. Valitar la situaziun possian ins dentant pir proxima primavaira. Sco Giorgio Renz ha ditg a la FMR vegnian ils custs per las mesiras purtads dal chantun e las vischnancas pertutgadas.
