Siglir tar il cuntegn
Inhalt

Engiadina Engiadina Bassa: or da rument verd duess daventar charvun

La Regiun Engiadina Bassa/Val Müstair ha laschà analisar la realisaziun d’in center per il rument organic – in uschenumnà implant da pirolisa.

Deponia verda.
Legenda: Pirolisa sa numna il nov sistem ch'i duai dar per reciclar rument verd. RTR, Georg Luzzi

Las deponias communalas da rument verd, laina ed ulteriuras restanzas dad ierts e guauds vegnan bainbaud serradas, quai prescriva il chantun. La Regiun Engiadina-Bassa/Val Müstair ha ussa laschà analisar da quant rument ch'i sa tracta insumma e tge pussaivladads ch'èn avant maun per allontanar u per reutilisar quel material.

In center da pirolisa

Il material surmenziunà dess vegnir reciclà. Il resultat fiss la realisaziun da charvun. Quel charvun pudess vegnir duvrà en differentas variantas sco per exempel en la branscha da realisaziun da medicaments u era sco ladim en l’agricultura.

Cun in sumegliant indriz èsi anc pussaivel da trair a niz la chalira ed era producir forza electrica.

L’analisa realisada è vegnida finanziada tranter auter era da l'uffizi per l'ambient chantunal ed era dal federal (BAFU). Omadus mussan grond interess per quest project cun caracter da pionier.

Ils studi davart la realisabladad è ussa sin maisa. La Regiun Engiadina Bassa/Val Müstair analisescha ussa ils proxims pass sco per exempel il lieu adattà, la finanziaziun e collavuraziun tranter ils vitgs da la regiun da la Val Müstair, Engiadina Bassa enfin a Samignun.

RR actualitad