-
Bild 1 von 4Legenda: Visualisaziun dal project per il nov hotel da resort. mad
-
Bild 2 von 4Legenda: Visualisaziun dal project per il nov hotel da resort. mad
-
Bild 3 von 4Legenda: Visualisaziun dal project per il nov hotel da resort. mad
-
Bild 4 von 4Legenda: Visualisaziun dal project per il nov hotel da resort. mad
L’hotel modern cun 100 chombras e 200 letgs duai vegnir construì sin territori da la vischnanca da Rachögna a la fin da la pista che vegn a val. Pervi dal lieu gist sper pista èsi er ina finamira da collavurar stretgamain cun las pendicularas Motta Naluns. Quint fan ins cun investiziuns da 16-20 milliuns francs per l’emprima fasa dal project, ha declerà l’hotelier Kurt Baumgartner ad RTR. El aveva gia emprovà da realisar in project sin l'areal Trü a Scuol. La populaziun aveva dentant betg approvà in midament en ina zona turistica la fin dal 2014.
Hotel attractiv per famiglias
Il project prevesa er ina partiziun da Welness. Grazia als pretschs duaja el er esser attractiv per famiglias cun uffants. Ultra quai vuli ins trair a niz las sinergias ch'èn avant maun cun ils ulteriurs hotels da la societad a Scuol.
Sche l’hotel vegn construì, duai vegnir decis entaifer il proxim mez onn. Lura pudessan las lavurs da construcziun cumenzar l’auter onn e l’hotel pudess vegnir avert per l’entschatta da la stagiun 2018/19.
Duas chasas da vacanzas en ina segunda etappa
En ina segunda etappa èsi previs da bajegiar duas ulteriuras chasas cun mintgamai 30 abitaziuns vacanzas. Als possessurs da la abitaziuns duai star a disposiziun l'entira purschida da l'hotel.
Tut en tut avess l'entir ressort lura ina capacitad da var 500 letgs che duain generar passa 70'000 pernottaziuns dapli.