Sin ils ultims dus kilometers ha Bettina Gruber declassà a Flurina Eichholzer da Zernez e Sandra Wagenführ da Tavau. Malgrà la naiv ch’era crudada in abundanza il di avant la cursa, han las 934 passlungistas a la partenza pudì giudair in di da pumpa cun sulegl e bunas cundiziuns sin la loipa.
Naiveras han fatg suar ils organisaturs
Sco ch’il president dal comité d’organisaziun dal maraton da skis engiadinais, Ivo Damaso ha ditg ad RTR hajan las naiveras be paucas uras avant la partenza da la cursa da dunnas fatg suar a tut ils voluntaris. Surtut ils maschinists che han preparà la loipa da cursa hajan lavurà tras tut la notg. Era per ch’ils areals da partenza ed arriv èn stads deliberads da la naiv, hajan ins gì da far ulteriurs sforzs.
Cundiziuns optimalas per in record da participants
Las relaziuns sin il traject tranter Malögia e S-chanf èn suenter la blera naiv frestga fitg bunas ha confermà Ivo Damaso. Per la 48avla ediziun dal maraton da skis engiadinais sa hajan annunziads gia passa 12'000 curriduras e curridurs. Bain pussaivel saja perfin in record da participants per la gronda cursa populara da quest onn. A la partenza dal maraton da skis 2016 è er il champiun olimpic Dario Cologna.
