La Chamanna d’Es-cha na correspundia betg pli a las pretaisas dad ozendi. Quai ha declerà il president dal Club Alpin Svizzer Bernina, Christian Haller. Per pudair adattar la chamona sin 2’594 meters sur mar als basegns actuals, vuli dad ina vart ina modernisaziun da la cuschina e dals locals da deposit. Quai è collià cun in engrondiment da la chasa ch'è gia en duas parts, tras in ulteriur annex.
Optimar ed adattar situaziun
Part dal project fa er ina sanaziun da las installaziuns sanitarias cun in nov concept per l’aua persa. Ultra da quai dovri er adattaziuns a reguard la segirtad en connex cun mesiras da protecziun encunter il fieu.
Raps mancan anc
Da far quint ha il possessur da la Chamanna d’Es-cha, il CAS Bernina cun custs da project da radund 1,5 fin 2 milliuns francs. 25 % da quels raps datti or dal fond per chamonas dal Club Alpin Svizzer, ha declerà Christian Haller als commembers dal CAS Bernina durant la radunanza generala. Il rest ha da vegnir finanzià cun agens meds e donaziuns. Ultra da quai vul ins empruvar da survegnir in emprest u pigliar si ina ipoteca.
-
Bild 1 von 6. Il balcun tort, l'egl da la stiva privada en la Chamanna d'Es-cha. Bildquelle: mad.
-
Bild 2 von 6. Ir en tura cun ils skis cun ina fermativa a la Chamanna d'Es-cha. Bildquelle: mad.
-
Bild 3 von 6. La Chamanna d'Es-cha è er durant l'enviern punct da partenza ed arriv da differentas turas. Bildquelle: mad.
-
Bild 4 von 6. La Chamanna d'Es-cha ch'ins vesa suenter ina gita davent da Zuoz da ca. 3 uras. Bildquelle: mad.
-
Bild 5 von 6. En la stiva privada chattan fin 50 persunas plaz. Bildquelle: mad.
-
Bild 6 von 6. Enturn chasa porscha la Chamanna d'Es-cha plaz per radund 30 persunas. Bildquelle: mad.
Inauguraziun l’onn 2020
Per pudair realisar la renovaziun da la chamona che ha passa 80 onns, ha il CAS Bernina lantschà in’acziun «Renovaziun Chamanna d’Es-cha» per ir en tschertga da sponsurs e fauturs. Tenor il president da la societad vuless ins avair ensemen ils raps ils proxims 3-4 onns. Christian Haller è da buna speranza ch’ins possia inaugurar la chamona il 2020.
RR actualitad 08:00