L'associaziun Bike Val Müstair è fitg cuntenta cun la prim'emna dal project «Build and Bike» en Val Müstair. Tenor la suprastanza èn sa participadas 16 persunas da l'Austria, da la Germania e da la Svizra a l'emna per gidar da construir trails per velos da muntogna en Val Müstair. Ils participants han pudì far vacanzas gratuitas durant in'emna. Sco cunterprestaziun han els gidà adina la damaun da construir trails. Durant il suentermezdi han els pudì far turas cun il velo da muntogna.
Lavur e reclama
L'acziun haja gì in grond resun en las medias socialas. Ins haja gì bler dapli annunzias che posts libers. Ils participants ch'èn arrivads en Val Müstair èn intgantads da la cuntrada ed han gust da pudair dir ch'els hajan gidà tar la construcziun da tschertas passaschas. Divers dals participants vulan returnar en Val Müstair. Uschia ha l'acziun in effect da reclama en la scena da quels che van cul velo da muntogna.
La vischnanca da la Val Müstair profita da l'autra vart da la lavur ch'ils giasts specials fan lung las sendas en Val Müstair per avair la fin ina rait da trails per velos da muntogna. Quellas lavurs na pudess'ins per part betg far senzas agid da pliras persunas.
Durant il settember è planisada in'ulteriura emna da «Build and Bike» en Val Müstair.
-
Bild 1 von 7. La lavur vid il trail è ina lavur da team. Bildquelle: RTR, David Spinnler.
-
Bild 2 von 7. I drova blera crappa per questa passascha. Bildquelle: RTR, David Spinnler.
-
Bild 3 von 7. Qua ston ins lura era savair manevrar il velo da muntogna. Bildquelle: RTR, David Spinnler.
-
Bild 4 von 7. Lavur intensiva per construir ina passascha dad in trail en Val Müstair. Bildquelle: RTR, David Spinnler.
-
Bild 5 von 7. Ina pista perfetga. Bildquelle: RTR, David Spinnler.
-
Bild 6 von 7. Ina passascha cun crappa sco salaschada. Bildquelle: RTR, David Spinnler.
-
Bild 7 von 7. Qua pon ins ussa passar bain cun in velo da muntogna. Bildquelle: RTR, David Spinnler.