Il project da clima da l'Academia Engiadina e da ses glaziolog Felix Keller vul augmentar la segirezza sin ils lais da l'Engiadin'Ota. Ina part dal project prevesa tests da stress sin il lai da San Murezzan. Quels realisescha la scol'auta tecnica HTW da Cuira. Ils tests actuals examineschan per exempel l'elasticitad dal glatsch e la chargia ch'il glatsch porta. Ina maschina tira vi dal glatsch uschè ferm, enfin ch'il glatsch rumpa. Cun laser pon ins lura mesirar ils effects.
Tar il test dal mardi è il glatsch da 67 centimeters grossezza rut tar ina chargia da 2,5 tonnas. Tge che quai vul dir precis per il lai, calculeschan lura ils scienziads da la HTW en lur labor.
Segirtad per occurenzas d'enviern
Sin ils lais da l'Engiadin'Ota datti diversas occurenzas durant l'enviern, cura ch'ils lais èn schelads. Adina puspè datti accidents, saja quai cun maschinas da pista u era durant las cursas cun chavals dal White Turf.
Perquai han las vischnancas dals lais en Engiadin'Ota - San Murezzan, Silvaplauna, Segl e Bregaglia - incumbensà l'Academia Engiadina cun il project da clima. Uschia vul'ins augmentar la segirezza durant l'enviern, per pudair cuntinuar cun eveniments sco las cursas da chavals White Turf era en l'avegnir cun cundiziuns climaticas che sa midan.
-
Bild 1 von 5. Tests da stress per il glatsch dal lai da San Murezzan. Bildquelle: RTR, Ulrica Morell.
-
Bild 2 von 5. Cura rumpa il glatsch? Tests da stress per il glatsch sin il lai da San Murezzan. Bildquelle: RTR, Ulrica Morell.
-
Bild 3 von 5. Il project da clima vul porscher datas per savair co il glatsch reagescha cun in clima pli chaud. Bildquelle: RTR, Ulrica Morell.
-
Bild 4 von 5. Preparaziuns per ils tests da stress dal glatsch sin il lai da San Murezzan. Bildquelle: RTR, Ulrica Morell.
-
Bild 5 von 5. Sin il lai da San Murezzan datti tests da stress per il glatsch. Bildquelle: MAD.
RR actualitad 17:00